🚨 సంచలన తీర్పు: తండ్రీకొడుకుల కస్టడీ డెత్ కేసులో 9 మంది పోలీసులకు మరణశిక్ష
తమిళనాడులో ఆరేళ్ల క్రితం దేశవ్యాప్తంగా తీవ్ర సంచలనం సృష్టించిన సాతాంకులం తండ్రీకొడుకుల కస్టడీ డెత్ కేసులో మదురై కోర్టు సంచలన తీర్పు వెలువరించింది. సోమవారం వెలువడిన ఈ తీర్పులో, కస్టడీలో ఉన్న తండ్రీకొడుకుల మృతికి కారణమైన 9 మంది పోలీసులను దోషులుగా తేల్చి వారికి మరణశిక్ష విధించింది.
ఈ ఘటన 2020లో తమిళనాడు తూత్తుకుడి జిల్లా సాతాంకులం పోలీస్ స్టేషన్లో చోటుచేసుకుంది. లాక్డౌన్ నిబంధనలు ఉల్లంఘించారనే ఆరోపణలతో పి. జయరాజ్ (59) మరియు ఆయన కుమారుడు జె. బెనిక్స్ (31) ను పోలీసులు అదుపులోకి తీసుకున్నారు. అనంతరం వారిని పోలీస్ స్టేషన్లో తీవ్రంగా హింసించారని ఆరోపణలు వచ్చాయి. కస్టడీలో జరిగిన ఈ హింస కారణంగా తండ్రీకొడుకులు తీవ్ర గాయాలతో ఆస్పత్రికి తరలించగా చికిత్స పొందుతూ ఇద్దరూ మరణించారు.
ఈ ఘటన దేశవ్యాప్తంగా తీవ్ర ఆగ్రహాన్ని రేకెత్తించింది. సామాజిక మాధ్యమాల్లో భారీ నిరసనలు వ్యక్తమయ్యాయి. మానవ హక్కుల సంఘాలు కూడా ఈ కేసుపై తీవ్రంగా స్పందించాయి. ప్రజల ఆగ్రహం నేపథ్యంలో ఈ కేసును తరువాత సీబీఐకి అప్పగించారు.
సుదీర్ఘ విచారణ అనంతరం మదురై కోర్టు నిందితులైన పోలీసులపై విచారణ పూర్తి చేసి తండ్రీకొడుకులపై అమానుషంగా హింస చేసి వారి మరణానికి కారణమయ్యారని నిర్ధారించింది. ఈ నేపథ్యంలో నిందితులైన 9 మంది పోలీసులకు మరణశిక్ష విధిస్తూ కోర్టు కీలక తీర్పు ఇచ్చింది.
ఈ తీర్పు పోలీస్ కస్టడీలో జరిగే హింసాత్మక ఘటనలపై కఠిన సందేశంగా భావిస్తున్నారు. భవిష్యత్తులో ఇటువంటి ఘటనలు పునరావృతం కాకుండా ఉండేందుకు ఇది ఒక హెచ్చరికగా నిలుస్తుందని న్యాయ నిపుణులు పేర్కొంటున్నారు.