రూ.13.25 లక్షల మోసం
ఫిర్యాదు వివరాల ప్రకారం.. QVSE యాప్లో పెట్టుబడులు పెట్టి లాభాలు పొందుతున్నట్లు చూపిస్తూ ఒక వ్యక్తి పలువురిని నమ్మించినట్లు పోలీసులు తెలిపారు. అతను పంపిన లింక్ ద్వారా బాధితులు యాప్ను ఇన్స్టాల్ చేసుకుని తొలుత ఫోన్పే ద్వారా కొంత మొత్తాన్ని చెల్లించారు.
అనంతరం యాప్లో పెట్టుబడి మొత్తం డాలర్ల రూపంలో పెరుగుతున్నట్లు కనిపించడంతో దాన్ని నిజమైన లాభంగా భావించి మరింత మొత్తాన్ని పెట్టుబడిగా పెట్టినట్లు ఫిర్యాదులో పేర్కొన్నారు.
ఈ క్రమంలో సొంత డబ్బులతో పాటు కుటుంబ సభ్యులు, బంధువులు, పరిచయస్తుల నుంచి సేకరించిన నగదును ఫోన్పే, నగదు రూపంలో చెల్లిస్తూ మొత్తం రూ.13,25,000 వరకు పెట్టుబడి పెట్టినట్లు తెలిపారు.
అయితే యాప్లో పెట్టుబడి మొత్తం పెరుగుతున్నట్లు కనిపించినప్పటికీ, ఆ డబ్బును విత్డ్రా చేసుకునే అవకాశం లేకపోవడంతో బాధితులకు అనుమానం వచ్చింది. సంబంధిత వ్యక్తిని సంప్రదించగా మరికొంత సమయం వేచి ఉండాలని చెప్పినట్లు ఫిర్యాదులో పేర్కొన్నారు.
దీంతో తాము మోసపోయినట్లు గుర్తించి పోలీసులను ఆశ్రయించారు. ఫిర్యాదు మేరకు 18-09-2026న జడ్చర్ల పట్టణ పోలీస్ స్టేషన్లో కేసు నమోదు చేసి దర్యాప్తు చేస్తున్నట్లు ఇన్స్పెక్టర్ కమలాకర్ తెలిపారు.
తక్కువ సమయంలో అధిక లాభాలు, డాలర్ల రూపంలో భారీ రాబడులు వస్తాయని చెప్పే ఫేక్ ఇన్వెస్ట్మెంట్ యాప్లు, ఆన్లైన్ స్కీమ్లను ప్రజలు నమ్మవద్దని ఇన్స్పెక్టర్ కమలాకర్ సూచించారు.
యాప్లో పెట్టుబడి మొత్తం లేదా లాభం పెరుగుతున్నట్లు కనిపించడం మాత్రమే అది నిజమైన పెట్టుబడి అని నిర్ధారించడానికి ఆధారం కాదన్నారు. పెట్టుబడి పెట్టే ముందు సంబంధిత సంస్థ, యాప్ చట్టబద్ధత, విశ్వసనీయతను పూర్తిగా పరిశీలించాలని సూచించారు.
తెలియని లింకులపై క్లిక్ చేయవద్దని, అనుమానాస్పద యాప్లను ఇన్స్టాల్ చేయవద్దని, OTPలు, UPI PINలు, బ్యాంక్ ఖాతా వివరాలు, పాస్వర్డ్లు ఎవరికీ వెల్లడించవద్దని హెచ్చరించారు.
సైబర్ మోసానికి గురైతే వెంటనే 1930 సైబర్ క్రైమ్ హెల్ప్లైన్కు సమాచారం ఇవ్వాలని పోలీసులు సూచించారు.
అలాగే National Cyber Crime Reporting Portalలో ఫిర్యాదు చేయాలని తెలిపారు. మోసం జరిగిన వెంటనే ఫిర్యాదు చేస్తే సంబంధిత లావాదేవీలను నిలిపివేసి, మోసపోయిన నగదును ఫ్రీజ్ చేయడానికి చర్యలు తీసుకునే అవకాశం ఉంటుందని పేర్కొన్నారు.
అనుమానాస్పద పెట్టుబడులపై ఎవరైనా ప్రోత్సహిస్తే వెంటనే సమీప పోలీస్ స్టేషన్కు సమాచారం ఇవ్వాలని, సమాచారదాతల వివరాలను గోప్యంగా ఉంచి చట్టపరమైన చర్యలు తీసుకుంటామని ఇన్స్పెక్టర్ కమలాకర్ తెలిపారు.
ఇన్స్పెక్టర్
జడ్చర్ల పట్టణ పోలీస్ స్టేషన్