హైదరాబాద్‌లో కోలివింగ్ హాస్టళ్ల దందా వెలుగులోకి వచ్చింది. హైదరాబాద్ నగరానికి ఉద్యోగం, చదువు లేదా ఇతర అవసరాల కోసం రాష్ట్రాలు, దేశాల నుంచి వేలాది మంది యువత చేరుకుంటున్నారు. వారిని టార్గెట్ చేస్తూ కొంతమంది హాస్టల్ నిర్వాహకులు దోపిడీకి పాల్పడుతున్నారు. కోలివింగ్ హాస్టల్స్ అంటూ వేలకు వేలు దోచుకుంటున్నారు. హైదరాబాద్‌లోని చాలా ప్రాంతాల్లో ఈ కోలివింగ్ హాస్టల్స్ పెరుగుతున్నాయి. మాదాపూర్, జూబ్లీహిల్స్, హైటెక్ సిటీ, బేగంపేట్, కూకట్‌పల్లి వంటి ప్రముఖ ప్రాంతాల్లో ఈ హాస్టల్స్ ఎక్కువగా ఉన్నాయి. ప్రస్తుతానికి.. కొందరు హాస్టల్ నిర్వాహకులు తమ హాస్టల్స్‌ను అసాంఘిక కార్యకలాపాలకు అడ్డాగా మార్చుకోవడం ఒక పెద్ద సమస్యగా మారింది. సాధారణంగా యువత హాస్టల్లో రెండు పడకలు, మూడు పడకల గదుల్లో ఉంటారు. ఎందుకంటే.. ఇదినూతన స్నేహ సంబంధాలను నిర్మించడానికి.. ఉద్యోగుల మధ్య సంబంధాలను మెరుగుపరచడానికి, విద్యార్థులకు చదువులో ఒకరినొకరు సహాయం చేసుకోవడానికి సహాయపడుతుంది. అయితే కొన్ని పీజీ హాస్టల్స్ దారి తప్పుతున్నాయి. హాస్టల్ నిర్వాహకులు ఇక్కడ చీకటి దందాను నడిపిస్తున్నారు. ఒకే గదిలో అమ్మాయి, అబ్బాయి ఉండవచ్చంటూ.. ప్రకటనలు చేస్తున్నారు. తెలిసిన వారి ద్వారా సిటీకి వచ్చిన వారిని ఈ బారిన పడేలా చేస్తున్నారు. మరో విషయం ఏంటంటే.. పోలీసులే మాకు పార్టనర్‌లు అంటూ కొత్త దందా చేస్తున్నారు. యువకుల బలహీనతలను కొందరు బలంగా మార్చుకుంటారు. మీ గదిలో అమ్మాయిలు ఉంటారు.. ఏం జరిగినా మాకు సంబంధం లేదు.. వివాదాలు మాత్రం రాకుండా చూసుకోండి.. నెలకు ఇంత చెల్లిస్తే సరిపోతుందంటూ.. ప్రచారం చేస్తున్నారట. అయితే వారి మాటలు విని వేలకు వేలు డబ్బులు చెల్లించి మోసపోయిన వారు కూడా ఉన్నారని తెలుస్తోంది. సాధారణంగా ఉద్యోగస్తులు, విద్యార్థులు, ఆతిథ్య కార్యక్రమాలకు వచ్చే ఇతరులు పీజీ హాస్టల్స్‌లో చేరడం ఎక్కువగా చూస్తూ ఉన్నాం.. కానీ.. కోలివింగ్ హాస్టల్స్‌లో మాత్రం వివిధ వయస్సుల వ్యక్తులు, వివిధ జాబ్స్ చేస్తూ ఒకే గదిలో ఉండవచ్చు. కోలివింగ్ హాస్టల్స్‌లో లగ్జరీ సౌకర్యాలు కూడా ఉంటాయి. వైఫై, ఎయిర్ కండీషనింగ్ గదులు, భోజన సౌకర్యం, వాషింగ్ మెషీన్, 24 గంటల నీటి సౌకర్యం, భద్రత తదితర సౌకర్యాలు అందుబాటులో ఉంటాయి. కానీ.. వీటి ధరలు కూడా ఎక్కువగా ఉండవచ్చు. కొంతమంది వివిధ కారణాలతో వీటిని ఎంచుకుంటారు. అయితే కొందరు మాత్రం సాంఘికంగా కార్యకలాపాలకు మాత్రం వాడుకుంటున్నారు. నగరంలో ఎన్నో బాయ్స్, గర్ల్స్ హాస్టల్స్ ఉన్నా.. కోలివింగ్ ఆశ చూపి.. వారి జీవితాలతో ఆడుకుంటున్నారు హాస్టల్స్ నిర్వాహకులు. ఇలాంటి వాటిపై పోలీసులు దృష్టి పెట్టాలని నగరవాసులు కోరుతున్నారు.