పోలీస్ స్టేషన్‌లో మహిళా కానిస్టేబుల్‌కు శ్రీమంతం..!
కుటుంబ సభ్యుల్లా అండగా నిలిచిన నారాయణపేట పోలీసులు
ఖాకీ యూనిఫాం వెనుక ఆప్యాయత.. పోలీస్ కుటుంబంలో వేడుక సందడి!
నిత్యం విధి నిర్వహణలో నిమగ్నమై ప్రజల భద్రత కోసం నిరంతరం శ్రమించే పోలీసుల జీవితాల్లో కుటుంబానికి, వ్యక్తిగత జీవితానికి సమయం కేటాయించడం ఎంతో అరుదు. విధి నిర్వహణలో ఎదురయ్యే ఒత్తిళ్లు, సవాళ్ల మధ్య పోలీస్ సిబ్బంది ఒకరికొకరు కుటుంబ సభ్యుల్లా అండగా నిలుస్తూ ఆప్యాయతను పంచుకుంటారనే దానికి నారాయణపేట పోలీస్ స్టేషన్‌లో జరిగిన కార్యక్రమం నిదర్శనంగా నిలిచింది.
ఏడు నెలల గర్భిణికి ఘనంగా శ్రీమంతం
నారాయణపేట పోలీస్ స్టేషన్‌లో కానిస్టేబుల్‌గా విధులు నిర్వహిస్తున్న మహిళా కానిస్టేబుల్ శిరీష ప్రస్తుతం ఏడు నెలల గర్భిణిగా ఉన్నారు. ఈ సందర్భంగా గురువారం పోలీస్ స్టేషన్‌లో ఆమెకు శ్రీమంతం వేడుకను ఘనంగా నిర్వహించారు.
సీఐ శివశంకర్, ఎస్‌ఐ వెంకటేశ్వర్లు ఆధ్వర్యంలో మహిళా ఎస్‌ఐ గాయత్రి, ఇతర పోలీస్ అధికారులు, సిబ్బంది కలిసి సంప్రదాయబద్ధంగా శ్రీమంతం వేడుకను నిర్వహించి ఆమెను ఘనంగా సత్కరించారు.
చీర, పూలు, పండ్లు అందించి శుభాకాంక్షలు
ఈ సందర్భంగా శిరీషకు చీర, పూలు, పండ్లు అందజేసి కుటుంబ సభ్యుల మాదిరిగా ఆప్యాయంగా శుభాకాంక్షలు తెలిపారు. విధి నిర్వహణలో ఎల్లప్పుడూ బిజీగా ఉండే పోలీస్ అధికారులు, సిబ్బంది తమ సహోద్యోగి జీవితంలో ఎంతో ప్రత్యేకమైన ఈ సందర్భాన్ని గుర్తించి శ్రీమంతం వేడుకను నిర్వహించడం పోలీస్ శాఖలోని ఆత్మీయత, ఐక్యత, పరస్పర సహకారానికి నిదర్శనంగా నిలిచింది.
పోలీస్ అధికారులకు కృతజ్ఞతలు తెలిపిన శిరీష
తనకు పోలీస్ స్టేషన్‌లోని ఉన్నతాధికారులు, సహచర సిబ్బంది కుటుంబ సభ్యుల్లా అండగా నిలిచి, తన శ్రీమంతం వేడుకను ఇంత ఘనంగా నిర్వహించడం పట్ల మహిళా కానిస్టేబుల్ శిరీష ఆనందం వ్యక్తం చేస్తూ పోలీస్ అధికారులకు, సిబ్బందికి ప్రత్యేక కృతజ్ఞతలు తెలిపారు.
పోలీస్ సిబ్బంది మధ్య కనిపించిన ఈ అనుబంధం అందరికీ ఆదర్శం.
నిజం ఆగదు.. తప్పు దాగదు!
ఉమ్మడి పాలమూరు జిల్లా వార్తలు