```html
పెళ్లి చేసుకుంటానని నమ్మించి లైంగిక వేధింపులు!
రూ.5 కోట్లు తీసుకుని ఎగవేత?
ముంబయి బిజినెస్ ఉమెన్కు భారీ మోసం.. ఆరుగురిపై కేసు నమోదు
హైదరాబాద్: పెళ్లి చేసుకుంటానని నమ్మించి ఓ మహిళను లైంగికంగా వేధించడంతో పాటు, వ్యాపార లావాదేవీల పేరుతో సుమారు రూ.5 కోట్ల మేర మోసం చేసినట్లు వచ్చిన ఫిర్యాదుపై పంజాగుట్ట పోలీసులు కేసు నమోదు చేశారు. ఈ వ్యవహారంలో మొత్తం ఆరుగురిని నిందితులుగా పేర్కొన్నారు.
వ్యాపార పరిచయంతో మొదలైన మోసం?
ముంబయికి చెందిన 42 ఏళ్ల బాధితురాలు 'ది రాయల్ సింధ్' పేరుతో డ్రైఫ్రూట్స్ ట్రేడింగ్, బ్రోకరేజ్ వ్యాపారం నిర్వహిస్తున్నారు. ఈ క్రమంలో 2024 జూలైలో హైదరాబాద్కు చెందిన మనీష్ భాటియా ఆమెకు పరిచయమయ్యాడు.
మొదట వ్యాపార ఆర్డర్లు ఇచ్చి నమ్మకం సంపాదించినట్లు బాధితురాలు తన ఫిర్యాదులో పేర్కొన్నారు. అనంతరం తన సోదరుడు పవన్ భాటియా, స్నేహితుడు మహమ్మద్ రషీద్తో పాటు నదీమ్ జుమాని, జీషాన్ అహ్మద్, ఇర్ఫాన్ భాడాలను పరిచయం చేసినట్లు తెలిపారు.
రూ.5 కోట్ల విలువైన సరుకు బకాయిలు
వీరికి డ్రైఫ్రూట్స్ సరుకులను అప్పుగా సరఫరా చేయగా, బకాయిల మొత్తం క్రమంగా సుమారు రూ.5 కోట్లకు చేరినట్లు బాధితురాలు ఆరోపించారు. డబ్బులు తిరిగి చెల్లించాలని అడిగినప్పటికీ నిందితులు తప్పించుకుని తిరుగుతున్నారని ఫిర్యాదులో పేర్కొన్నారు.
పెళ్లి పేరుతో వేధింపులు.. ఫొటోలతో బెదిరింపులు
మరోవైపు మనీష్ భాటియా పెళ్లి చేసుకుంటానని నమ్మించి పలుమార్లు హైదరాబాద్కు పిలిపించి లైంగికంగా వేధించినట్లు బాధితురాలు ఆరోపించారు.
వ్యాపార బకాయిల గురించి ప్రశ్నించినప్పుడు వీడియో కాల్స్ సమయంలో తీసిన అర్ధనగ్న ఫొటోలను ఇతర వ్యాపారులకు పంపిస్తానని బెదిరించినట్లు ఫిర్యాదులో వెల్లడించారు.
జీరో ఎఫ్ఐఆర్ ఆధారంగా కేసు నమోదు
ఈ ఘటనపై బాధితురాలు నవంబర్ 13న ముంబయిలోని మహిమ్ పోలీస్ స్టేషన్లో జీరో ఎఫ్ఐఆర్ నమోదు చేయించారు. దాని ఆధారంగా పంజాగుట్ట పోలీసులు కేసు నమోదు చేసి దర్యాప్తు చేపట్టారు.
