ఒకే బస్సులో తండ్రీకొడుకులు: డ్రైవర్ నాన్న, కండక్టర్ కొడుకు!
ఆర్టీసీ బస్సులో ఒక్కసారిగా వినిపించిన ఈ మాటతో ప్రయాణికులు కాస్త ఆశ్చర్యపోయారు. సాధారణంగా డ్రైవర్ను ‘అన్నా’ లేదా ‘అంకుల్’ అని పిలుస్తుంటారు. కానీ ఇక్కడ మాత్రం ఓ వ్యక్తి డ్రైవర్ను ఏకంగా ‘నాన్న’ అని పిలవడంతో ప్రయాణికుల్లో ఆసక్తి మొదలైంది.
కామారెడ్డి జిల్లాలో ఓ ఆర్టీసీ బస్సులో ఇది నిజంగానే జరిగిన ఆసక్తికరమైన ఘటన. బోర్లం గ్రామానికి చెందిన గుజ్జరి గంగారం దశాబ్దాలుగా ఆర్టీసీలో డ్రైవర్గా విధులు నిర్వహిస్తున్నారు. ఎన్నో ఏళ్లుగా స్టీరింగ్ పట్టుకుని ప్రయాణికులను గమ్యస్థానాలకు సురక్షితంగా చేర్చడమే తన బాధ్యతగా పనిచేస్తున్నారు.
ఇక గంగారం కుమారుడు రంజిత్కుమార్ ఇటీవలే ఔట్సోర్సింగ్ విధానంలో ఆర్టీసీ కండక్టర్గా ఉద్యోగంలో చేరాడు. తండ్రి ఎన్నో ఏళ్లుగా ఆర్టీసీలో పనిచేస్తుండగా.. ఇప్పుడు కొడుకు కూడా అదే సంస్థలో అడుగుపెట్టడం కుటుంబానికి సంతోషాన్ని కలిగించింది. బాన్సువాడ డిపో అధికారులు తండ్రీకొడుకులకు ఒకే బస్సులో డ్యూటీ వేశారు. దీంతో నిజామాబాద్–బాన్సువాడ రూట్లో నడిచే బస్సులో తండ్రి డ్రైవర్గా స్టీరింగ్ పట్టుకుంటే.. కొడుకు కండక్టర్గా ప్రయాణికులకు టికెట్లు ఇస్తూ కనిపించాడు.
ఇంట్లో తండ్రి–కొడుకులుగా ఉండే గంగారం, రంజిత్కుమార్.. డ్యూటీలో మాత్రం డ్రైవర్–కండక్టర్లుగా బాధ్యతలు నిర్వర్తిస్తున్నారు. తండ్రి బస్సును నడుపుతుంటే.. కొడుకు ప్రయాణికుల వద్దకు వెళ్లి టికెట్లు ఇస్తూ, బస్సులో ప్రయాణికుల సౌకర్యాలను చూసుకుంటున్నాడు. ఒకే బస్సులో ఇద్దరూ కలిసి విధులు నిర్వహించడంతో ప్రయాణికులు కూడా ఆసక్తిగా గమనిస్తున్నారు.